Þann 15. júní sl. samþykkti Alþingi breytingar á lögum um skyldutryggingu lífeyrisréttinda og starfsemi lífeyrissjóða nr. 129/1997 sem taka gildi 1. janúar 2023. Frá þeim tíma verður lágmarksiðgjald í V deild 15,5% í stað 12% þannig að launagreiðendur þurfa að greiða 11,5% mótframlag til sjóðsins. Samhliða þessari breytingu á lágmarksiðgjaldi hækkar lágmarkstryggingavernd samkvæmt lögum úr 1,4% í 1,8%.
Frá stofnun sjóðsins hafa sjóðfélagar í V deild haft þann valkost að geta ráðstafað allt að 3,5% af mótframlagi launagreiðenda í séreignasparnað. Þeir sjóðfélagar sem hafa nýtt sér þann valkost geta átt von á breytingum hvað það varðar um áramótin. Starfsfólks sjóðsins mun hafa samband við sjóðfélaga í haust þegar áhrif framan-greindar lagabreytingar liggja fyrir.
Lagabreytingarnar hafa engin áhrif á réttindi sjóðfélaga í B deild sjóðsins en enn er óljóst um áhrif þeirra á A deildina.
Uppfært 23.12.22:
Sjóðurinn hefur ákveðið að fyrst um sinn eftir áramótin verði ekki gerðar breytingar, þannig að óbreytt fyrirkomulag verður skv. þeim samningum sem sjóðfélagar hafa gert.
Þessum upplýsingum hefur verið komið á framfæri við séreignasjóði sem móttaka þessar greiðslur.